పిల్లలు పుట్టలేదని భార్యపై వేధింపులు.. కత్తితో పొడిచి భర్తను చంపిన మహిళ!

బెంగళూరులోని కెంపేగౌడనగర లక్ష్మీపురలో దారుణ ఘటన చోటుచేసుకుంది. పిల్లలు పుట్టలేదంటూ భర్త వేధింపులకు గురిచేస్తున్నాడనే కారణంతో భార్య అతడిని కత్తితో పొడిచి హత్య చేసినట్లు పోలీసులు తెలిపారు.

రాజశేఖర్ (43), మాలశ్రీ (35) దంపతులకు వివాహమై ఏళ్లు గడిచినా సంతానం కలగలేదు. ఈ విషయమై భర్త మద్యం తాగి వచ్చి తరచూ అవమానిస్తూ గొడవపడేవాడని సమాచారం.

బుధవారం రాత్రి మరోసారి గొడవ జరగడంతో మాలశ్రీ వంటింట్లోని కత్తితో భర్త ఛాతీపై పొడిచినట్లు ఆరోపణలు ఉన్నాయి. తీవ్రంగా గాయపడిన రాజశేఖర్ ఆస్పత్రికి తరలించేలోపే మృతి చెందాడు.

నిందితురాలిని అరెస్ట్ చేసిన పోలీసులు కేసు నమోదు చేసి దర్యాప్తు చేపట్టారు.