స్కూల్ నిలిపివేసిన సర్టిఫికెట్లు తిరిగి బాలికల చేతికి.. సీఎం ప్రజావాణి చొరవతో సమస్య పరిష్కారం!

హైదరాబాద్ నారపల్లిలోని నల్ల మల్లారెడ్డి ఫౌండేషన్ స్కూల్ యాజమాన్యం విద్యా సర్టిఫికెట్లు ఇవ్వడం లేదంటూ సీఎం ప్రజావాణిని ఆశ్రయించిన ఇద్దరు విద్యార్థినుల సమస్య పరిష్కారమైంది.

తెలంగాణ రాష్ట్ర ప్రణాళికా మండలి వైస్ చైర్‌పర్సన్, సీఎం ప్రజావాణి రాష్ట్రస్థాయి ఇన్‌చార్జ్ గద్వాల విజయలక్ష్మి స్పందించి విద్యాశాఖ ఆర్‌జేడీతో మాట్లాడటంతో పాటు ముఖ్య కార్యదర్శికి లేఖ రాశారు.

దీంతో విద్యాశాఖ అధికారులు పాఠశాల నుంచి టీసీ, బోనఫైడ్, మార్కుల మెమోలు సహా అవసరమైన ధ్రువపత్రాలను సేకరించారు. శుక్రవారం ప్రజావాణిలో విజయలక్ష్మి వాటిని విద్యార్థినులకు అందజేశారు.

విద్యార్థుల భవిష్యత్తుకు ఆటంకం కలిగించేలా సర్టిఫికెట్లు నిలిపివేయడం సరికాదని, ఇలాంటి ఘటనలు పునరావృతం కాకుండా చూడాలని విజయలక్ష్మి స్పష్టం చేశారు.