6 నెలల పాటు భక్తులకు కేదార్‌నాథ్ దర్శనం బంద్.. శీతాకాలం కోసం మూసుకున్న ఆలయ ద్వారాలు!

హిమాలయాల్లోని ప్రసిద్ధ పుణ్యక్షేత్రం కేదార్‌నాథ్ ఆలయ ద్వారాలను నవంబర్ 11న ఉదయం 8:30 గంటలకు శీతాకాలం నేపథ్యంలో మూసివేశారు. సముద్ర మట్టానికి 11,755 అడుగుల ఎత్తులో ఉన్న ఈ ఆలయ పరిసరాల్లో భారీ మంచు కురుస్తుండటంతో ఏటా ఆరు నెలల పాటు దర్శనాలను నిలిపివేస్తారు.

ఆలయ మూసివేత అనంతరం బాబా కేదార్‌నాథ్ పంచముఖి ఉత్సవ విగ్రహాన్ని ఉఖీమఠ్‌లోని ఓంకారేశ్వర్ ఆలయానికి తరలిస్తారు. శీతాకాలంలో భక్తులు అక్కడ స్వామివారిని దర్శించుకోవచ్చు. ఆలయ గర్భగుడిలో వెలిగించే అఖండ జ్యోతి ఆరు నెలల పాటు వెలుగుతూనే ఉంటుందని భక్తుల విశ్వాసం.