కేరళం మొత్తం పెళ్ళికాని ప్రసాద్ లే

పెళ్లి సంబంధాల కోసం 2 కిలోమీటర్ల క్యూ.. 1,500 దరఖాస్తులు.. 7 వేల మంది రాక!

కేరళలో వినూత్న మ్యారేజ్ క్యాంప్.. 80 శాతం మంది పురుషులే.. పెళ్లి కోసం తల్లిదండ్రుల ఎదురుచూపులు!

పెళ్లి సంబంధాల కోసం మ్యాట్రిమోనీ వెబ్‌సైట్లు, పెళ్లిళ్ల పేరయ్యలను ఆశ్రయించడం సాధారణం. కానీ కేరళలో మాత్రం పెళ్లి సంబంధాల కోసం ఏకంగా 2 కిలోమీటర్ల మేర క్యూ కట్టారు. ఒక ఉచిత మ్యారేజ్ క్యాంప్‌కు ఊహించని స్పందన లభించింది. సుమారు 1,500 మంది దరఖాస్తు చేసుకోగా.. దాదాపు 7 వేల మంది ఈ కార్యక్రమానికి హాజరయ్యారు.

కేరళలోని కోజికోడ్ సమీపంలో కరంతూర్ హరహర మహాదేవ ఆలయంలో ఈ ఉచిత వివాహ రిజిస్ట్రేషన్ క్యాంప్ నిర్వహించారు. నిర్వాహకులు కేవలం 1,500 దరఖాస్తులనే స్వీకరించాలని భావించినప్పటికీ.. భారీ సంఖ్యలో ప్రజలు తరలిరావడంతో పరిస్థితి అదుపు తప్పింది. వచ్చిన జనంతో హైవేపై రెండు బస్సుల దూరం మేర ట్రాఫిక్ కూడా నిలిచిపోయింది.

80 శాతం మంది పురుషులే!

ఈ క్యాంప్‌లో మరో ఆసక్తికరమైన విషయం వెలుగులోకి వచ్చింది. వచ్చిన దరఖాస్తుల్లో దాదాపు 80 శాతం మంది పురుషులవే. వీరిలో ఎక్కువ మంది 30 ఏళ్లు దాటినవారు కాగా.. కొందరు 40 నుంచి 50 ఏళ్ల వయసున్నవారు కూడా ఉన్నారు. మహిళల్లో చాలామంది రెండో వివాహం కోసం సంబంధాలు వెతుకుతున్నవారు. ఏళ్ల తరబడి పెళ్లిళ్లు కాక, సరైన సంబంధాలు దొరక్క ఇబ్బందులు పడుతున్న తల్లిదండ్రులు తమ కుమారుల కోసం స్వయంగా ఈ క్యాంప్‌కు వచ్చారు.

మ్యారేజ్ క్యాంప్‌కు కొనసాగింపు!

ఈ కార్యక్రమానికి వచ్చిన స్పందనతో నిర్వాహకులు మరిన్ని క్యాంపులు నిర్వహించాలని నిర్ణయించారు. దరఖాస్తులను పరిశీలించి, సంబంధాలను సరిపోల్చేందుకు 10 నుంచి 20 రోజుల సమయం పడుతుందని తెలిపారు. నవంబర్ 22 తర్వాత ప్రతి ఆదివారం ఉదయం 7 గంటల నుంచి 10 గంటల వరకు ఈ ఉచిత మ్యారేజ్ క్యాంపును కొనసాగించాలని నిర్ణయించారు.

మొత్తానికి, పెళ్లి సంబంధాల కోసం ఎదురుచూస్తున్న వేలాది మందికి ఈ కార్యక్రమం కొత్త ఆశలు కల్పించింది. అదే సమయంలో వివాహ సంబంధాల విషయంలో సమాజంలో పెరుగుతున్న సవాళ్లను కూడా ఈ క్యాంప్ మరోసారి బయటపెట్టింది.