తెలంగాణ కరువుపై రాజకీయ వేడి.. నీటి నిర్వహణపై ప్రభుత్వాన్ని ప్రశ్నించిన కేటీఆర్
తెలంగాణలో నెలకొన్న కరువు, సాగునీటి పరిస్థితులపై BRS వర్కింగ్ ప్రెసిడెంట్ కేటీఆర్ రాష్ట్ర ప్రభుత్వాన్ని విమర్శించారు.
గోదావరి, కృష్ణా జలాలను సరైన సమయంలో ఎత్తిపోసి నిల్వ చేసుకుని ఉంటే ప్రస్తుత పరిస్థితి తీవ్రంగా ఉండేది కాదని ఆయన అభిప్రాయపడ్డారు. “ఏపీలో పట్టిసీమ ద్వారా నీటిని తరలించుకుని వినియోగిస్తుంటే, తెలంగాణలో అందుబాటులో ఉన్న నీటిని సద్వినియోగం చేయలేకపోయారు” అని ఆరోపించారు.
నీటి నిర్వహణలో ప్రభుత్వ నిర్ణయాల వల్లే పలు జిల్లాల్లో సాగునీటి ఇబ్బందులు పెరిగాయని, “ఇది ప్రకృతి తెచ్చిన కరువు కాదు.. ప్రభుత్వ నిర్వహణ వైఫల్యం వల్ల వచ్చిన పరిస్థితి” అని కేటీఆర్ వ్యాఖ్యానించారు.
అయితే రాష్ట్ర ప్రభుత్వం మాత్రం ఎల్‌నినో ప్రభావం, వర్షాభావ పరిస్థితులు, తగ్గిన జలాశయ నిల్వలే ప్రస్తుత నీటి సంక్షోభానికి ప్రధాన కారణాలని చెబుతోంది. తాగునీరు, సాగునీరు, విద్యుత్ సరఫరాపై ప్రత్యేక కార్యాచరణ చేపట్టినట్లు ప్రభుత్వం వెల్లడించింది.
