ఇంటి పనిమనిషే సమాచారం ఇచ్చిందా?.. మాజీ IPS అధికారి భార్య హత్య కేసులో నేపాల్ గ్యాంగ్ గుట్టురట్టు
హైదరాబాద్ జూబ్లీహిల్స్‌లో మాజీ IPS అధికారి రే వినయ్ రంజన్ భార్య తనూజా రంజన్ హత్య కేసులో నెలల తరబడి సాగిన దర్యాప్తుకు కీలక మలుపు లభించింది.
ఈ కేసులో ఇంటి పనిమనిషి ధర్మ తిరువా అలియాస్ కల్పన సహా నలుగురిని హైదరాబాద్ పోలీసులు అరెస్ట్ చేశారు. ఇంటి యజమాని బయటకు వెళ్లిన సమయం, ఇంట్లో ఉన్న బంగారం, విలువైన వస్తువుల సమాచారం నిందితులకు అందించడంలో పనిమనిషి కీలక పాత్ర పోషించినట్లు పోలీసులు చెబుతున్నారు.
మే 7–8 మధ్యరాత్రి నిందితులు ప్రశాసన్ నగర్‌లోని ఇంట్లోకి ప్రవేశించి, తనూజాను అదుపులోకి తీసుకుని ఊపిరాడకుండా చేసి హత్య చేసినట్లు పోలీసుల దర్యాప్తులో వెల్లడైంది. అనంతరం సుమారు 225 గ్రాముల బంగారు ఆభరణాలు, ఇతర విలువైన వస్తువులతో పరారైనట్లు ఆరోపిస్తున్నారు.
పోలీసుల ప్రకారం, నిందితులు ముందుగా ఇంటి పరిసరాలను పరిశీలించి, రెండు గ్రూపులుగా విడిపోయి పక్కా ప్లాన్‌తో నేరానికి పాల్పడ్డారు. తర్వాత కాజీపేట వైపు వెళ్లి దోచుకున్న సొత్తును పంచుకుని, వేర్వేరు మార్గాల్లో నేపాల్ వైపు పారిపోయినట్లు గుర్తించారు.
CCTV ఫుటేజ్, కాల్ డేటా, టెక్నికల్ ఆధారాలతో ఐదు నెలలకు పైగా గాలించిన ప్రత్యేక దర్యాప్తు బృందం, అక్టోబర్ 26న నాంపల్లి రైల్వే స్టేషన్ సమీపంలో నలుగురిని అదుపులోకి తీసుకుంది.
ఈ కేసులో మరికొందరు నిందితులు ఇంకా పరారీలో ఉన్నారని, వారిని పట్టుకునేందుకు గాలింపు కొనసాగుతోందని పోలీసులు తెలిపారు.
