కూతురి మందుల కోసం ఐదు వేల రూపాయలు దొంగిలించిన తండ్రి అరెస్ట్

ఒక తండ్రికి పిల్లల ఫీజు కష్టం.. మరో తండ్రికి కూతురి మందుల కోసం ఆరాటం.. రూ.5 వేల చోరీ వెనుక కన్నీటి కథ!

హైదరాబాద్ బంజారాహిల్స్‌లో జరిగిన రూ.5 వేల చోరీ ఘటనలో ఇద్దరు తండ్రుల ఆర్థిక కష్టాలు వెలుగులోకి వచ్చాయి.

పిల్లల స్కూల్ ఫీజు చెల్లించేందుకు కష్టపడి సంపాదించిన రూ.5 వేలతో ఇంటికి వెళ్తున్న ఓ టైలర్‌ను జలగం వెంగళరావు పార్కు వద్ద సాధిక్ (39) అనే వ్యక్తి అడ్డుకున్నాడు. బైక్ నుంచి పెట్రోల్ లీకవుతోందని చెప్పి దృష్టి మరల్చి, జేబులోని డబ్బును అపహరించినట్లు పోలీసులు తెలిపారు.

సీసీటీవీ దృశ్యాలు, బైక్ నంబర్ ఆధారంగా యాకుత్‌పురాకు చెందిన సాధిక్‌ను పోలీసులు అరెస్ట్ చేశారు. అనారోగ్యంతో ఉన్న తన కుమార్తెకు మందులు కొనడానికి డబ్బుల్లేక చోరీ చేసినట్లు విచారణలో నిందితుడు చెప్పినట్లు పోలీసులు వెల్లడించారు.

చోరీ చేసిన రూ.5 వేలలో రూ.1,100 మందుల కోసం ఖర్చు చేయగా, మిగిలిన మొత్తాన్ని పోలీసులు స్వాధీనం చేసుకున్నారు. నిందితుడిని రిమాండ్‌కు తరలించారు.

ఒకరి పిల్లల చదువు కోసం దాచుకున్న డబ్బు.. మరొకరి బిడ్డ వైద్యం కోసం జరిగిన చోరీ.. ఈ ఘటనలో ఇద్దరు తండ్రుల కష్టాలు చర్చనీయాంశమయ్యాయి.