🌊 కొత్తపట్నం తీరంలో విషాదం.. నలుగురు మత్స్యకారుల మృతదేహాలు లభ్యం

ప్రకాశం జిల్లా కొత్తపట్నం తీరంలో తీవ్ర విషాదం చోటుచేసుకుంది. మురసు తుఫాన్ సమయంలో సముద్రంలో బోటు బోల్తాపడటంతో గల్లంతైన తమిళనాడుకు చెందిన మత్స్యకారుల్లో నలుగురి మృతదేహాలు లభించాయి.

బోటులో మొత్తం 9 మంది మత్స్యకారులు ఉన్నట్లు అధికారులు తెలిపారు. వీరిలో ముగ్గురి మృతదేహాలు కొత్తపట్నం తీరానికి కొట్టుకురాగా, మరో మృతదేహాన్ని గాలింపు బృందాలు గుర్తించాయి.

మిగిలిన ఐదుగురి ఆచూకీ కోసం కోస్ట్ గార్డ్, మెరైన్ పోలీసులు గాలింపు కొనసాగిస్తున్నారు.

మృతదేహాలను ఒంగోలు ప్రభుత్వ ఆస్పత్రికి తరలించారు. తమిళనాడు అధికారులు కూడా ప్రకాశం జిల్లాకు చేరుకుంటున్నారు.