రైతులకు బ్యాంకులు అండగా నిలవాలి.. పంట రుణాలపై భట్టి విక్రమార్క కీలక ఆదేశాలు!

ఎల్‌నినో ప్రభావంతో వర్షాభావం, కరవు పరిస్థితులు నెలకొన్న నేపథ్యంలో రైతులకు బ్యాంకులు పూర్తి సహకారం అందించాలని డిప్యూటీ సీఎం భట్టి విక్రమార్క కోరారు. హైదరాబాద్ ప్రజాభవన్‌లో రాష్ట్రస్థాయి బ్యాంకర్ల కమిటీ (SLBC)తో నిర్వహించిన సమావేశంలో ఆర్బీఐ మార్గదర్శకాల ప్రకారం పంట రుణాలను రీషెడ్యూల్ చేసి, రబీ సీజన్‌కు కొత్త రుణాలు సకాలంలో మంజూరు చేయాలని సూచించారు. చిన్న, సన్నకారు, కౌలు రైతులకు ప్రాధాన్యం ఇవ్వడంతో పాటు విద్యా, గృహ, ఎంఎస్ఎంఈ రుణాలను విస్తరించాలని కోరారు. మహిళా సంఘాలు, నిరుద్యోగ యువత స్వయం ఉపాధికి బ్యాంకులు సహకరించాలని పేర్కొన్నారు. సమావేశంలో మంత్రి తుమ్మల నాగేశ్వరరావు పాల్గొన్నారు.