⚡ రైతులకు కరెంట్‌ కోతలు పెడితే.. ఐఏఎస్‌లనూ సస్పెండ్ చేస్తాం: సీఎం రేవంత్‌రెడ్డి
రైతులకు నిరంతర విద్యుత్‌ సరఫరా కల్పించడంలో నిర్లక్ష్యం వహిస్తే ఐఏఎస్‌ అధికారులపైనా సస్పెన్షన్‌ చర్యలు తీసుకుంటామని ముఖ్యమంత్రి రేవంత్‌రెడ్డి హెచ్చరించారు.
🌾 పంటలను కాపాడుకునేందుకు రానున్న 20 రోజులు అత్యంత కీలకమని.. ఈ సమయంలో విద్యుత్‌ కోతలను సహించబోమని స్పష్టం చేశారు. పంటలు చేతికొచ్చే వరకు వ్యవసాయానికి నిరంతర విద్యుత్‌ అందించాలని ఆదేశించారు.
ఎల్‌నినోను ఎదుర్కొనేందుకు కొవిడ్‌ తరహాలో సన్నద్ధం కావాలని సూచించిన సీఎం.. వచ్చే ఏడాది జూన్‌ వరకు సమగ్ర కార్యాచరణ ప్రణాళిక సిద్ధం చేయాలని అన్ని శాఖలను ఆదేశించారు.
💧 తాగునీరు, పశుగ్రాసం కొరత తలెత్తకుండా ముందస్తు చర్యలు చేపట్టాలని సూచించారు.
ప్రతి మండలంలో గ్రూప్‌–1, గ్రూప్‌–2 అధికారులను నియమించి.. కరువు పరిస్థితులు, పంటలు, విద్యుత్‌, తాగునీరు, పశుగ్రాసం లభ్యతను పర్యవేక్షించాలని ఆదేశించారు.
గ్రామసభలు, సాంస్కృతిక కార్యక్రమాల ద్వారా ప్రజలకు అవగాహన కల్పించి, పరిస్థితులను ఎదుర్కొనేందుకు సిద్ధం చేయాలని సూచించారు.
