అల్మాస్‌గూడలో ఇద్దరు యువతులపై దాడి.. మతమార్పిడి ఆరోపణలతో వివాదం
రంగారెడ్డి జిల్లా అల్మాస్‌గూడలోని డాక్టర్ బీఆర్ అంబేద్కర్ విగ్రహం సమీపంలో ఇద్దరు యువతులపై కొందరు వ్యక్తులు దాడి చేసిన ఘటన కలకలం రేపింది.
పిల్లలకు చాక్లెట్లు ఇచ్చి మతమార్పిడికి ప్రయత్నిస్తున్నారంటూ కొందరు వారిని ప్రశ్నించి దుర్భాషలాడినట్లు ఆరోపణలు ఉన్నాయి. అయితే తాము తమ అత్తను కలిసేందుకు అక్కడికి వచ్చామని యువతులు చెప్పినట్లు సమాచారం. మతమార్పిడి ఆరోపణలపై ఇప్పటివరకు అధికారిక నిర్ధారణ లేదు.
ఈ ఘటనను ఖండిస్తూ దళిత క్రిస్టియన్ సంఘాలు, ప్రజా సంఘాలు, రాజకీయ పార్టీల ప్రతినిధులు బడంగ్‌పేట చౌరస్తాలో నిరసన చేపట్టారు. యువతులపై దాడికి పాల్పడిన వారిని గుర్తించి కఠిన చర్యలు తీసుకోవాలని డిమాండ్ చేశారు.
మహిళల భద్రతను కాపాడడంతో పాటు, మత సామరస్యాన్ని దెబ్బతీసే ఘటనలను అరికట్టాలని నిరసనకారులు కోరారు. పరిస్థితిని దృష్టిలో పెట్టుకుని పోలీసులు బందోబస్తు ఏర్పాటు చేశారు.
