రాత్రి నూడుల్స్.. ఉదయానికి ఐదుగురు విగతజీవులు! గ్రేటర్ నోయిడాలో కుటుంబం మొత్తం మృతి

ఉత్తరప్రదేశ్‌లోని గ్రేటర్ నోయిడా రబుపురా ప్రాంతంలో తీవ్ర విషాదం చోటుచేసుకుంది. ఒకే కుటుంబానికి చెందిన ఐదుగురు ఇంట్లో విగతజీవులుగా కనిపించడం కలకలం రేపింది.

మృతులను మహేశ్, అతని భార్య లలిత, కుమారులు లడ్డూ, శాక్షత్‌, కుమార్తె మిస్తీగా గుర్తించారు. కుటుంబ సభ్యులు ముందు రోజు రాత్రి నూడుల్స్ తిన్నట్లు మహేశ్ తల్లి, స్థానికులు పోలీసులకు తెలిపినట్లు సమాచారం.

ప్రాథమికంగా ఫుడ్ పాయిజనింగ్ కారణమై ఉండొచ్చని పోలీసులు అనుమానిస్తున్నారు. అయితే ఐదుగురి మృతికి ఖచ్చితమైన కారణం పోస్టుమార్టం, ఫోరెన్సిక్ పరీక్షల అనంతరమే తేలనుంది.

మృతదేహాలను పోస్టుమార్టం కోసం ఆసుపత్రికి తరలించి పోలీసులు దర్యాప్తు చేపట్టారు.