వనపర్తిలో దారుణం.. భర్త హత్యకు భార్య, ప్రియుడి కుట్ర
వనపర్తి జిల్లా కేంద్రంలోని బ్రహ్మం గారి వీధిలో దారుణం జరిగింది. పెళ్లయిన నెల రోజులకే భర్తను చంపేందుకు భార్య, ఆమె ప్రియుడు కుట్ర పన్నారు.
ప్రియుడు షాకీర్, అతని స్నేహితుడు మహేశ్వర్ లాల్‌తో కలిసి భార్య షాహేదా ప్లాన్ చేయగా, హైదరాబాద్ నుంచి వనపర్తికి వచ్చి హత్యాయత్నం చేశారు.
అర్ధరాత్రి వేళ ఇంట్లో నిద్రిస్తున్న భర్త షబ్బీర్ ముఖంపై HIT స్ప్రే చల్లారు. షాహేదా భర్త చేతులు పట్టుకోగా, ప్రియుడు షాకీర్ బెల్టుతో గొంతు బిగించి చంపేందుకు యత్నించాడు. మరో నిందితుడు మహేశ్వర్ లాల్ బయట పల్సర్ బైక్‌పై వేచి ఉన్నాడు.
షబ్బీర్ గట్టిగా అరవడంతో సోదరుడు బయటకు వచ్చాడు. కుటుంబ సభ్యులు తలుపు తట్టడంతో నిందితుల ప్రయత్నానికి ఆటంకం ఏర్పడింది. బాధితుడు నిందితులను తోసేసి ప్రాణాలతో బయటకు వచ్చాడు.
పోలీస్ కంట్రోల్ రూమ్‌కు సమాచారం అందడంతో పెట్రోలింగ్ పోలీసులు రంగంలోకి దిగారు. భార్య, ప్రియుడు సహా స్నేహితుడిని పోలీసులు అరెస్ట్ చేశారు. కేసు నమోదు చేసి ముగ్గురిని రిమాండ్‌కు తరలించారు.
