హైదరాబాద్ ఎయిర్‌పోర్టులో ₹1.56 కోట్ల విదేశీ కరెన్సీ పట్టివేత.. ఇద్దరు ప్రయాణికులు అరెస్ట్

హైదరాబాద్ రాజీవ్ గాంధీ అంతర్జాతీయ విమానాశ్రయంలో ₹1.56 కోట్ల విలువైన విదేశీ కరెన్సీని DRI అధికారులు స్వాధీనం చేసుకున్నారు. ఈ కేసులో ఇద్దరు భారతీయ ప్రయాణికులను అరెస్ట్ చేశారు.

హైదరాబాద్ నుంచి కౌలాలంపూర్ వెళ్లే AirAsia విమానంలో ప్రయాణించేందుకు వచ్చిన ఓ వ్యక్తి క్యాబిన్ బ్యాగేజీలో తనిఖీలు నిర్వహించగా, బట్టల మధ్య నల్ల ప్లాస్టిక్ కవర్‌లో దాచిన USD 66,600, MYR 3,773, SGD 2 గుర్తించారు. వీటి విలువ సుమారు ₹63.62 లక్షలు.

అతని సమాచారంతో అదే విమానంలో ప్రయాణిస్తున్న ఓ మహిళను తనిఖీ చేయగా, ఆమె బ్యాగేజీలో USD 97,600, సుమారు ₹91.94 లక్షల విలువైన కరెన్సీ బయటపడింది.

మొత్తంగా USD 1,64,200 సహా ₹1.56 కోట్ల విదేశీ కరెన్సీ స్వాధీనం చేసుకున్న అధికారులు, చట్టబద్ధమైన ఆధారాలు చూపలేకపోవడంతో ఇద్దరినీ అరెస్ట్ చేశారు. దర్యాప్తు కొనసాగుతోంది.