ఇబ్రహీంపట్నంలో పీడీఎస్ బియ్యం సీజ్

ఇబ్రహీంపట్నంలోని న్యూ బన్సల్ రైస్ ఇండస్ట్రీస్‌లో 778 బస్తాల పీడీఎస్ బియ్యం అధికారులు స్వాధీనం చేసుకున్నారు. వైట్ రేషన్ కార్డుదారులకు అందాల్సిన ఈ బియ్యాన్ని నిల్వ చేసినట్లు అధికారులు గుర్తించారు. సివిల్ సప్లైస్, టాస్క్ ఫోర్స్ అధికారులు ఈ తనిఖీలు చేపట్టారు.

ల్యాబ్ పరీక్షల్లో ఇవి పీడీఎస్‌కు చెందిన ఫోర్టిఫైడ్ రైస్ కెర్నల్స్ (FRK) అని నిర్ధారణ అయింది.

మొత్తం 778 బస్తాలలో 50 కేజీల బరువున్న 677 బస్తాలు, 25 కేజీల బరువున్న 101 బస్తాలు ఉన్నాయి. అక్రమ రవాణాకు సిద్ధంగా ఉన్న టీఎస్-03-యూబీ-3399 నంబర్ టాటా లారీని, అందులో దొరికిన మరో 51 బస్తాల బియ్యాన్ని సీజ్ చేశారు.

సిద్ధీపేట జిల్లా మోతె గ్రామంలోని భారతి ఇండస్ట్రీస్ నుంచి ఈ బియ్యాన్ని కొనుగోలు చేసినట్లు మిల్లు యజమాని గీతేష్ బన్సల్ అధికారులకు తెలిపారు.

తెలంగాణ పీడీఎస్ రైస్ కంట్రోల్ ఆర్డర్ 2016 క్లాజ్ 17(ఇ) కింద గీతేష్ బన్సల్, శ్రీరామ్ లోహియా, భారతి ఇండస్ట్రీస్ యజమాని నాగభూషణంపై కేసు నమోదు చేశారు.